காதலுக்கும் நேரம் கொடு!
கொட்டுதடி பனிவிழுந்து கூரை மீது – நீயும்
கட்டிக்கொள்ளும் தாவணியின் உயரம் போல
முட்டிக்கள்ளு நுரைபோல வீதி எங்கும் – பனி
மூடிக்கொண்டு கிடக்குதடி நீண்ட நேரம்
வட்டிக்கடன் கரைப்பதுபோல் பனியை உப்பு – முக
வாட்டமுடன் கரைக்குதடி மெதுவாய் எங்கும்
குட்டிப்பிள்ளை எங்களது நாயும் சோபா – ஏறிக்
குதிக்கமனம் இல்லாமல் கிடக்கு பாராய்
தட்டிக்கொண்டு நிக்கின்றாய் ரொட்டி இப்போ – பசியில்
தட்டுக்கொண்டு அலையவில்லை நானும் வந்து
தொட்டுக்கதை பேசிக்கட்டில் போர்வைக் குள்ளே – நீயும்
தூங்கிடனும் செல்போனைக் குறைத்துக் கொண்டு
தொட்டில்சுகம் தேடுகின்ற இந்த நேரம் – நீயும்
தோய்ந்துவிட்டு தலைதுடைத்தால் என்ன வாழ்க்கை?
விட்டுக்கொடு காதலுக்கும் கொஞ்ச நேரம் – மற்ற
வீட்டுவேலை அனைத்தையும்நாம் நாளை பார்ப்போம்!
இரா.சம்பந்தன்
