வெண்ணிலாவே!

 

ஈழமெனும் இலங்கைதனில் வெண்ணிலாவே – நீ

இருந்தனையோ தெரியலையே வெண்ணிலாவே

ஆழவெட்டு விழுந்ததனால் வெண்ணிலாவே – உன்

அழகுமுகம் போனதுவோ வெண்ணிலாவே!

 

பாதிமுகம் காட்டுகிறாய் வெண்ணிலாவே – மீதி

பறித்தனரோ இலங்கையிலே வெண்ணிலாவே

வீதியெலாம் தேடினையோ வெண்ணிலாவே – இல்லை

விதியென்று விட்டனையோ வெண்ணிலாவே

 

 

கம்பிமுள்ளு வேலிகளை வெண்ணிலாவே – நீ

கடந்துதானே வந்திருப்பாய் வெண்ணிலாவே

தம்பியம்மா இருவரையும் வெண்ணிலாவே – அங்கு

தாட்டனரோ எரித்தனரோ வெண்ணிலாவே

 

நான்பிறந்த தேசமதில் வெண்ணிலாவே – ஈழ

நாடுமலர் கின்றதென்றார் வெண்ணிலாவே

ஏன்பிறந்தேன் என்றுவென்னை வெண்ணிலாவே – இன்று

ஏங்கவைத்துப் போயினரே வெண்ணிலாவே

 

தென்னகத்து திராவிடரால் வெண்ணிலாவே – நாம்

தேடிக்கொண்ட ஆசையெலாம் வெண்ணிலாவே

என்னகத்தில் தேவையில்லை வெண்ணிலாவே – இதை

இன்றுணர்ந்து என்னபயன் வெண்ணிலாவே

 

வீரமென்ற ஒன்றைமட்டும் வெண்ணிலாவே – தேடி

விவேகமற்று வைத்திருந்தோம் வெண்ணிலாவே

தூரநின்ற எதிரிகளை வெண்ணிலாவே – நாம்

தூதுவிட்டு வரவழைத்தோம் வெண்ணிலாவே

 

பாடுபட்ட வீரமதை வெண்ணிலாவே – போற்றிப்

பாதுகாக்கத் தெரியவில்லை வெண்ணிலாவே

நாடுவிட்டு ஓடிவிட்டோம் வெண்ணிலாவே – இதில்

நாங்களுமே குற்றவாளி வெண்ணிலாவே

 

செய்ததெலாம் தியாகமதே வெண்ணிலாவே – அதைச்

செய்தவரை மறக்கவில்லை வெண்ணிலாவே

செய்துவிட்ட தியாகத்தால் வெண்ணிலாவே – நாங்கள்

சேர்த்ததென ஒன்றுமில்லை வெண்ணிலாவே

 

ஏடுகளும் இசைத்தட்டும் வெண்ணிலாவே – எங்கள்

இருவிழியை மறைத்தனவே வெண்ணிலாவே

மாடுகளாய்த் தலையசைத்து வெண்ணிலாவே – நாங்கள்

மானமற்று இருந்துவிட்டோம் வெண்ணிலாவே

 

தோற்றுவிட்டோம் என்பதனை வெண்ணிலாவே – இன்றும்

தூரவைக்கும் வேலைகள்தான் வெண்ணிலாவே

ஆற்றுகிறார் எம்மவர்கள் வெண்ணிலாவே – ஐயோ

ஆபத்தை உணராமல் வெண்ணிலாவே